Մեր մասին

Գլխավոր / Մեր մասին

Մեր մասին

«Արմենիա» միջազգային օդանավակայաններ» փակ բաժնետիրական ընկերությունը՝ որպես «Կորպորասիոն Ամերիկա Էյրփորթս» (Corporación América Airports) միջազգային ընկերության մաս, իր գործունեության առանցքում կարևորում է ոչ միայն ավիացիոն ենթակառուցվածքների զարգացումը, այլև ապագա սերունդների մասնագիտական ներուժի ձևավորումը։ 

Այս մոտեցման շրջանակում 2023 թվականից ընկերությունը Հայաստանում իրականացնում է «Հայաստանի սկսնակ լիդերներ» ծրագիրը:

«Հայաստանի սկսնակ լիդերներ»-ը Էռնեկյան ընտանիքի շարունակական ներդրումային ծրագրերից է Հայաստանի երիտասարդության համար: Այս բազմակողմանի ծրագիրն ընձեռում է մասնագիտական զարգացման հնարավորություններ, ապահովում համապատասխան միջավայր, ներգրավվածություն և միջազգային փորձառություն:

Ծրագրի զարգացումը

2023 թվականին «Կորպորասիոն Ամերիկա Էյրփորթս» ընկերությունը և «Արմենիա» միջազգային օդանավակայաններ» ՓԲԸ-ն առաջին անգամ մեկնարկեցին ծրագրի փորձնական փուլը՝ կրթաթոշակների տրամադրման միջոցով աջակցելով հայ երիտասարդներին։ Այս նախաձեռնության հիմնական նպատակն էր խթանել կրթությունը, նպաստել հայկական մշակութային ժառանգությանը և ներդրում ունենալ ապագա սերունդների զարգացման գործում։ Ծրագիրը կրում է շարունակական բնույթ՝ մշտապես լինել ուսանողների և երիտասարդ մասնագետների կողքին։ 

Չսահմանափակվելով միայն կրթաթոշակների տրամադրմամբ՝ ծրագիրը հետագա տարիներին ընդլայնվեց՝ ներառելով նոր նախաձեռնություններ և հնարավորություն տալով ավելի մեծ թվով հայ երիտասարդների ներգրավվել զարգացման ծրագրերում։

Մասնագիտական զարգացման նոր հնարավորություններ

2025 թվականին մեկնարկեց «Հայաստանի շրջանավարտների մասնագիտական զարգացում» ծրագիրը, որը հանդիսանում է «Հայաստանի սկսնակ լիդերներ» նախաձեռնության մաս։ Այս ծրագիրը եզակի հնարավորություն է ընձեռում վերջերս ավարտած բուհերի շրջանավարտներին և կարիերայի սկզբնական փուլում գտնվող մասնագետներին ձեռք բերել գործնական փորձ «Զվարթնոց» միջազգային օդանավակայանում։ 

Ծրագրի հաջորդ փուլում մասնակիցները հնարավորություն են ստանում մասնակցելու միջազգային գործուղման՝ «Կորպորասիոն Ամերիկա Էյրփորթս» ընկերության միջազգային ցանցի օդանավակայաններում՝ Արգենտինայում, Բրազիլիայում, Էկվադորում, Իտալիայում կամ Ուրուգվայում։

Նոր նախաձեռնություններ

2026 թվականին ծրագիրը շարունակվում է նոր գաղափարով՝ «Հայաստանի ապագայի տեսլականներ» նախաձեռնությամբ, որի նպատակն է խթանել նորարարական մտածողությունը: